Provimi
Neni 26
Studenti fiton të drejtën të futet
në provimin e një lënde, kur ka shlyer
detyrimet vjetore që lidhen me atë lëndë,
të parashikuara për shlyerje në planin
mësimor. Proçesverbali i shlyerjes së
këtyre detyrimeve plotësohet nga pedagogu
në përfundim të procesit mësimor,
para sesionit të provimeve dhe dorëzohet
në sekretarinë mësimore.
Emrat e studentëve që kanë fituar të
drejtën për të hyrë në provimin
e lëndës, paraqiten në Fletën
e Provimit. Ajo plotësohet me emra dhe mbyllet
nga sekretaria mësimore, nënshkruhet nga
Dekani ose Zëvendësdekani përkundrejt
nënshkrimit të sekretarisë dhe mban
vulën e Fakultetit. Fleta e Provimit i dorëzohet
komisionit të provimit ditën e provimit.
Me përfundimin e provimit, kryetari i komisionit
e dorëzon atë në sekretari.
Në asnjë rast Fleta e Provimit nuk duhet
të ketë koregjime dhe askush nuk ka të
drejtë të shtojë emra në të.
Marrjet në dorëzim të saj bëhen
me firmë.
Neni 27
Provimet e riprovimet zhvillohen brenda afatit të
caktuar në strukturën e vitit akademik,
miratuar nga Këshilli i Fakultetit. Datat e tyre
propozohen nga Departamenti, miratohen nga dekanati
dhe shpallen jo më vonë se dy javë
para fillimit të sesionit.
Neni 28
Provimet zhvillohen në orën e datën
e caktuar. Në rast pamundësie të jashtëzakonshme
të zhvillimit të provimit ditën e caktuar,
Dekani, me urdhër me shkrim, e anullon e cakton
një datë të mëvonshme e cila u
bëhet e njohur studentëve.
Studentët merren në provimin e kursit nga
dy vetë: titullari i lëndës dhe asistenti
përkatës të cilët kanë zhvilluar
lëndën. Nëse lënda nuk ka patur
asistent, Përgjegjësi i Departamentit cakton
një asistent të një disipline të
afërt. Nëse titullari i lëndës
ose asistenti i tij, për arsye madhore nuk mund
të marrin pjesë në provim, Përgjegjësi
i Departamentit cakton, me shkrim, punonjësit
që do t'i zëvendësojnë.
Provimet me shkrim bëhen të sekretuar.
Ndalohet hyrja në provim e personave të
jashtëm, qofshin dhe antarë të personelit
universitar, me përjashtim të drejtuesit
të Departamentit, të Fakultetit e persona
të tjerë të autorizuar me shkrim nga
Dekani ose Rektori per të kryer kontroll.
Neni 29
Studenti, në sistemin me ose pa shkëputje
nga puna, nuk lejohet të hyjë për të
dyten herë në provimin e një lënde,
brenda një sesioni. Studenti nuk mund të
hyjë në të njëjtën ditë
në dy provime në lëndë të
ndryshme.
Studenti paraqitet në provim me dokument identifikimi
me fotografi.
Riprovimet dhe Mbartja
Neni 30
Studenti i sistemit me shkëputje nga puna ka
të drejtë të hyjë në sesionin
e vjeshtës (sesioni i riprovimeve) kur ka jo
më shumë se katër detyrime mësimore
të pashlyera; në këtë numur përfshihen
dhe detyrimet e mbartura.
Nëse detyrimet e mbartura nuk shlyhen, studenti
shpallet përsëritës për vitin
mësimor që ndjek. Studenti bursist humbet
të drejtën e bursës për vitin
që përsërit.
Studenti në sistemin me shkëputje nga puna
shpallet përsëritës kur mbas përfundimit
të sesionit të vjeshtës, mbetet në
më shumë se dy detyrime mësimore.
Në çdo vit mësimor studenti ka të
drejtë të mbartë deri dy detyrime dhe
të provohet për to deri në dy herë
në vitin pasardhës. Herën e parë,
para sesionit të provimeve të dimrit, në
kohën e përcaktuar në strukturën
e vitit mësimor; herën e dytë, lejohet
vetëm në sesionin e riprovimeve.
Studenti në sistemin pa shkëputje nga puna
është i detyruar që, në vitin
pasardhës, të shlyejë paraprakisht
detyrimet e mbetura; mbas kësaj, i lind e drejta
të shlyejë detyrimet e kursit që ndjek.
Neni 31
Studenti i vitit të fundit që, në përfundim
të provimeve të kursit, rezulton me deri
tri detyrime të palikuiduara, ka të drejtë
t'i likuidoje ato në një periudhë të
caktuar nga Dekanati, përpara sesionit të
provimit të shtetit.
Studenti që shlyen këto detyrime, lejohet
të hyjë në provimin e formimit ose
në mbrojtjen e diplomës. Në rast të
kundërt, i lind e drejta e shlyerjes së
këtyre detyrimeve në sesionin e riprovimeve
(të vjeshtës), ndërsa diplomimi bëhet
në sesionin e dimrit.
Studentët e vitit të fundit, që në
përfundim të sesionit të verës
rezultojnë me më shumë se tre detyrime
të pashlyera, konsiderohen përsëritës
për atë vit shkollor.
Në çdo fund sesioni, Dekanati shpall studentët
përsëritës dhe ata të përjashtuar.
Neni 32
Studentët që lëvizin në kuadrin
e projekteve e programeve ndërkombëtare
në të cilat Universiteti i Tiranës
merr pjesë, lirohen nga detyrimet e frekuentimit
parashikuar nga neni 21. Atyre u njihen provimet e
dhëna jashtë shtetit për lëndët
e ngjashme dhe kur kthehen në atdhe, duhet të
shlyejnë detyrimet për lëndët
e tjera.
Praktikat Profesionale
Neni 33
Studentët e sistemit me shkëputje nga puna
kanë të detyrueshme kryerjen e praktikës
profesionale, kur ajo perfshihet në planet mësimore.
Me fillimin e vitit akademik, Dekanati u komunikon
studentëve kohën e kryerjes dhe programin
e saj.
Studenti që nuk realizon programin e praktikës
profesionale, i nënshtrohet rregullave të
vendosura si për të gjitha detyrimet e tjera.
Neni 34
Praktikat profesionale zhvillohen në institucione
sipas profilit të përgatitjes së studentit
dhe nën drejtimin e pedagogut të caktuar
nga Departamenti përkatës.
Studenti detyrohet të respektojë rregullat
e institucionit ku kryen këtë proçes.
Neni 35
Gjatë kryerjes së praktikës profesionale,
punonjësi mësimor që e drejton atë,
ushtron kontroll të vazhdueshëm dhe mban
lidhje me qendrën ku ajo kryhet.
Në përfundim të praktikës profesionale,
studenti përgatit një relacion për
punën e kryer e cila vlerësohet nga pedagogu
që e drejton praktikën, pasi merr edhe mendimin
e qendrës ku është kryer ajo. Vlerësimi
bëhet me notë.
Transferimet, ndërrimi i sistemit të studimeve
Neni 36
Universiteti i Tiranes pranon transferime studentësh
në vite të ndërmjetme nga universitete
të tjera, në të njëjtën degë
e sistem dhe lejon largimin e studentëve të
tij për në universtitete të tjera,
sipas proçedurave të parashikuara në
këtë Rregullore.
Proçedurat transferuese përfundojnë
një muaj para fillimit të vitit akademik.
Neni 37
Studentët e Universitetit të Tiranës
të cilët duan të transferohen në
universitete të tjera të vendit, në
të njëjtën degë dhe sistem, paraqesin
kërkesën në Dekanatin e Fakultetit
ku kryejnë studimet; Dekanati shqyrton kërkesat
dhe, nëse e gjykon të arsyeshme, ia përcjell
Rektoratit i cili, pasi merr vendimin miratues, u
përcjell propozimet universiteteve përkatëse.
Pas përgjigjes së pranimit nga universiteti
pritës, përcillet dokumentacioni i plotë
i studentit: detyrimet e shlyera me notat përkatëse,
dëftesa e shkollës së mesme, dokumentacioni
i bursës etj.
Neni 38
Për studentët e universiteteve të tjera
që duan të transferohen në Universitetin
e Tiranës, propozimi vjen nga Rektorati i Universitetit
përcjellës, i shoqëruar me të
dhënat të hollësishme për studentin:
dega, kursi, sistemi i studimit, detyrimet e shlyera
dhe notat përkatëse, çertifikate
e gjendjes civile me fotografi, nëse gëzon
të drejtën e bursës ose jo, programet
e lëndëve që ka kryer.
Vendimin për pranimin e studentëve të
propozuar për transferim, e merr Rektorati ,
pasi ka marrë mendimin e dekanatit përkatës,
duke patur parasysh mundësitë e kapacitetin
e degës (deri në 5% të numurit të
pranimeve të reja të vitit) si dhe rezultatin
e ekuivalentimit, duke respektuar nenin 30 të
kësaj Rregulloreje.
Neni 39
Për studentët që duan të transferohen
në Universitetin e Tiranës, komisioni i
ekuivalentimit, i ngritur pranë çdo Departamenti,
mbi bazën e dokumentacionit që dërgon
universiteti përkatës, përcakton detyrimet
që do të ketë studenti, nëse pranohet
në atë degë, sipas planit mësimor
në fuqi si dhe njohjen e shlyerjes së lëndëve
me ekuivalencë.
Neni 40
Kalimi nga sistemi me shkëputje nga puna, në
sistemin pa shkëputje nga puna, bëhet me
vendim të Rektoratit, me propozim të Dekanatit,
mbi bazën e kërkesës së studentit
të interesuar, pasi ai të ketë përfunduar
vitin e parë.
Kalimi nga sistemi pa shkëputje nga puna në
atë me shkëputje nga puna bëhet me
vendim të Rektoratit, me propozim të Dekanatit,
mbi bazën e kërkesës së studentit
të interesuar, për studentet që kanë
mbaruar vitin e parë ose të dytë dhe
që kanë mesatare të notës së
studimeve mbi 8,5.
Në të dy rastet e kalimeve të përmendura
më sipër, duhet të mos cënohet
numëri i kuotave të studentëve në
kurset përkatëse, i caktuar nga Qeveria
dhe MASH.
Neni 41
Nuk lejohet, për çfarëdo arsye qoftë,
ndërrimi i degës së studimeve.
Studenti që fiton me konkurs një degë
të dytë në të njëjtin sistem
studimi, duhet të çrregjistrohet me parë
nga dega ku është, pastaj të regjistrohet
në degën e fituar, në këtë
rast ai i nënshtrohet detyrimit të pagesës,
ndaj shtetit, të kostos së shkollimit të
tij në degën paraardhëse, sipas përcaktimeve
të Ministrisë së Arsimit dhe të
Shkencës.
