Afati i Studimeve
Neni 14
Afati i studimeve në një degë apo profil
të caktuar, përcaktohet me vendim të
Këshillit të Ministrave.
Afati i studimeve universitare në Universitetin
e Tiranës, në sistemin me shkëputje
nga puna, nuk është më i vogël
se 4 vjet. Në sistemin pa shkëputje nga
puna, këto studimet zgjasin një vit më
shume se në degën përkatëse të
sistemit me shkëputje nga puna.
Neni 15
Afati maksimal i përfundimit të studimeve
të plota universitare në Universitetin e
Tiranës është deri në dyfishin
e afatit të rregullt.
Studentët që nuk arrijnë të përfundojne
studimet brenda këtij afati maksimal, humbasin
të drejtën e vazhdimit të studimeve.
Po ashtu, të drejtën e vazhdimit të
studimeve e humbasin edhe studentët të cilët
shpallen përsëritës të të
njëjtit vit akademik tri herë.
Afati maksimal i mbrojtjes së diplomës,
është deri në 3 vjet nga koha e përfundimit
të studimeve të plota. Brenda këtij
afati, studenti ka te drejtë të provohet
për mbrojtje (temë ose provim formimi) deri
në katër herë.
Neni 16
Studenti mund të ndërpresë studimet
në çdo kohë të vitit, për
një afat jo më tepër se tri vjet dhe
vetem për këto raste:
- kur sëmuret për periudha të gjata,
të dokumentuara me raport nga komisioni mjeko
- ligjor, ku të jenë shprehur qarte diagnoza
e rekomandimi;
- kur mbetet kryefamiljar, në raste fatkeqësish
e në kushte ekonomike të vështira,
të dokumentuar nga zyrat e Pushtetit Lokal;
- kur, për arësye ekonomike, detyrohet të
punësohet jashtë vendit, i justifikuar me
dokumentet përkatëse.
Neni 17
Ndërprerja e studimeve për një vit
bëhet me lejen e Dekanatit; për afate më
të gjata (deri 3 vjet) bëhet me miratimin
e Rektoratit, në bazë të propozimit
të Dekanatit.
Studenti paraqet kërkesën për leje
në dekanat si dhe dokumentet e tjera; ndërpreja
e studimeve është e rregullt kur ai merr
miratimin e kërkesës së tij nga organi
përkatës. Në të kundërt,
studenti mban vetë përgjegjësi për
rrjedhojat e mundëshme.
Ndërpreja e studimeve me miratimin e organit
përkatës quhet e justifikuar dhe nuk llogaritet
në vitet e përsëritura. Cdo ndërprerje
e pamiratuar e studimeve është e barazvlerëshme
me mosparaqitjen në procesin mësimor dhe
viti llogaritet në përsëritje.
Rikthimi i studentit, pas ndërprerjes së
justifikuar të studimeve, bëhet vetëm
në fillim të çdo simestri dhe jo
më vonë se dy javë nga fillimi i tij.
Format e Mësimit dhe Kontrollit të Dijes
Neni 18
Në Universitetin e Tiranës format kryesore
të punës mësimore janë leksionet,
seminaret, ushtrimet, punët laboratorike, praktikat
profesionale, detyrat e kursit, provimet e kursit,
provimet e formimit, temat e diplomave.
Departamentet, me miratim të Dekanatit, mund
të përcaktojnë edhe forma të tjera
të punës mësimore, veçanërisht
të kontrollit të dijeve të fituara.
Neni 19
Puna mësimore zhvillohet në bazë grupi
e kursi. Leksionet zhvillohen në bazë kursi
deri në 90 studentë; seminaret, ushtrimet
etj, në grupe me rreth 20 - 25 studentë.
Dekanati zbaton përcaktimet e mësipërme
në përputhje me mundësitë reale
të Fakultetit në mjedise shkollore dhe personel,
duke patur të drejtën e një tolerance
të pranueshme. Për raste të veçanta,
ndryshimet mund të bëhen vetëm me miratim
të Ministrisë së Arsimit dhe të
Shkencës.
Neni 20
Ndarja e studenteve në grupe fiksohet në
regjistrat e vitit të cilët kanë dokumente
zyrtare ku evidentohet zhvillimi i orëve të
mësimit nga pedagogët.
Neni 21
Leksionet, si formë e punës mësimore,
si rregull, janë me frekuentim fakultativ, por
për disa lëndë specifike në disa
degë, sipas përcaktimit të këshillave
të fakulteteve, frekuentimi është i
detyrueshëm për të paktën 75%
të orëve mësimore.
Seminaret, punët laboratorike, ushtrimet e format
e tjera të kontrollit të dijes, sipas përcaktimeve
të këshillave të fakulteteve, janë
të detyrueshme për frekuentim, për
të paktën 75% të orëve mësimore.
Studenti që frekuenton gjatë vitit më
pak se 50% të orëve mësimore të
detyruara, shpallet i paklasifikuar dhe nuk lejohet
të hyje në asnjë nga sesionet e provimit
të asaj lënde. Ai, qoftë si student
përsëritës në vitin përkatës,
apo si mbartës i kësaj lënde në
vitin pasardhës, i nënështrohet të
njëjtit rregull të përcaktuar për
frekuentimin; në të kundërt, studenti
cilësohet përsëri i paklasifikuar në
atë lëndë, duke mbajtur vetë përgjegjësitë
për rrjedhojat.
Studenti që frekuenton vetëm 50% - 75% të
orëve mësimore të detyruara, shpallet
i paklasifikuar, nuk lejohet të hyje në
provimin e sesionit të parë të asaj
lënde, por ka të drejtën të hyjë
në provimin e sesionit të vjeshtës.
Neni 22
Koha dhe auditori i zhvillimit të mësimit
përcaktohet në orarin e shpallur nga sekretaria
mësimore. Orari duhet të respektohet plotësisht
nga të gjithë studentët dhe mësimdhënësit
e Fakultetit.
Orari mësimor ndërtohet mbi kritere pedagogjike,
mbi bazën e harmonizimit të formave të
mësimit dhe të shpërndarjes racionale
të ngarkesës së studentit.
Ndryshimet eventuale në orar bëhen vetëm
nga sekretaria mësimore.
Neni 23
Kohëzgjatja e seancave mësimore është
60 minuta ose 90 minuta.
Neni 24
Shkalla e përvetësimit të programit
mësimor vlerësohet me sistemin prej dhjetë
notash. Notat nga pesë e lart janë kaluese.
Në format e kontrollit me shkrim përdoret
sistemi i vlerësimit me pikë, rezultati
i të cilit, detyrimisht, kthehet në notë.
Neni 25
Kontrolli i dijes së një lënde (provimi)
mund të bëhet: a) me shkrim, b) me gojë,
c) i kombinuar, me shkrim e me gojë; mënyrat
e kontrollit të dijes përcaktohen nga Departamenti
përkatës, mbështetur në planin
mësimor.
Tezat e provimit, në të gjitha rastet e
kontrollit, hartohen nga titullari i lëndës
së bashku me asistentin e tij (aty ku ka) dhe
miratohen e nënëshkruhen nga Përgjegjësi
i Seksionit apo i Departamentit.
